بيتزا من إختراعي

السلام عليكم و رحمة الله تعالى و بركاته أما بعد:
على فكرة هذه أول مشاركة لي في هذا الموقع واردت المشاركة بموضوع أجوا أن ينال إعجابكم و راهي ساهلة ما تدي والو...
بدون إطالة:
المقادير:غرفية فرينة+3 مغارف صغار خميرة خبز+شوية ملح+شوية سكر تخلطيهم كامل و مبعد تضيفي الزيت العادي اللي نطيبو بيه +زيت زيتون و تبسسيهم مليح و مبعد تلمي العجينة بالحليب السائل و يكون دافىء حتى تتحصلي على عجينة طرية و هشة نتركها ترتاح و تخمر...
من جهة نحضر الصلصة:طماطم حب تكرفجيها و ديريها في مقلاة تضيفيلها العكري و سنينات ثوم و شوية نتاع الملح انا منحبش نطيب بالطماطم المصبرة ندير في بلاصتها العكري الحلو ماشي الحار و نضيفو شوية نتاع الفلفل الاسود و نخليهم يتقلاو و كي تطيب لاصوص نطفو عليها و نضيفولها الزيت الزيتون و حشاوش مقطعة قطع صغيرة جدا و نضعها جانبا....نذهب الى العجينة تكون قد اختمرت نفردها بالحلال و نضعها في صينية الفرن تكون مرشوشة بالفرينة و نثقبها بشوكة و مبعد نديرو عليها لاصوص و نزودو شوية باش متنشفش و ندخلها الفرن
بلا ما تحمريها من الفوق راهي تطيب مليح من تحت نخرجوها من الفرن و فور خروجها نكرفجو عليها الفرماج روج و نديرو عليها اللحم المرحي او التونة و نزينها بالزيتون الاخضر و الاسود و المايونيز....اليكم الصور
ملاحظة:بالنسبة للعجينة لوكان تلميها بالماء وحدو راهي تجيك شوية يابسة بصح انا فضلت الحليب على الماء لخاطر الحليب رطب العجينة و تجي هشة و ممتعة في اكلها....جربوها و لن تندموا......ساهلة و فيسع تتخدم يعني ما تعطلكش في خدمتها...شهية طيبة