بتي فور كيما نتاع برا هايل

اليوم جبتلكم هذه الوصفة أيضا من عند أستاذي
المقادير
500 غ مارغري لابال + 650 غ سكر قلاصي + 5 بيض + كيلو و 200غ فرينة + لفاني + عطر القارص
ذوبي المارغرين بيدك ضيفلها السكر و خلطي بالباتور حتى يمتزج الخليط مليح ثم ضفي البيض بالحبة و خلطي بالباتور ثم الحبة الاخرى و خلطي و هكذا حتى تكملي البيض كامل ثم حطيلهم خليط الفرينة و لفاني و خلطي بيدك حتى يولي عجينة طرية شوية ثم سخني الفور و خرجي ب لابوش أدوي الشكل اللي تحبيه طويل أو التاج و دخليه للفور تحبي طيبيه أبيض و إذا حبيتي حمريه شوية و لصقي بالكونفيتور أو لاجولي زوج زوج
إذا حبيتي شكولا نقص مقدار من الفرينة و عوضيه بالكاكاو ( المقدار اللي تنحيه من الفرينة نفسه عوضيه كاكاو )
أسرار نجاح هذه الوصفة :
ضفي في الأول كيلو فرينة برك و طيبي حبة واحدة برك إذا بقى الشكل كيما دخلتيه كي كان عجينة أي بقاو الخطوط أعرفي بلي يكفي الفرينة و إذا تخسر زدي الفرينة
* الصينية لا تدهن و لا ترش
* سخني الفور كي تكوني قريب تكملي خلطه و طيبيه ثم ثم
* لا تضعي الخميرة
تقدري جربي نصف الكمية اقسمي كلش على زوج ( البيض ديري 2 و نص حبة مضربة)

شهية طيبة جربوه ماتندموش
المرة الجاية نحطلكم طريقة أخرى نتاعو أيضا