روز جربي : روز تونسي بالدجاج و الخضار

السلام عليكم و رحمة الله و بركاته

بسم الله



اليوم وصفة جديدة عليكم : أرز (روز) جربي , تونسي , بالخضر و الدجاج. إن شاء الله يعجبكم و تجربوه, هو صحي جدا جدا و بنين برشة.

ملاحظة : الكمية هنا كبيرة, تقدرو تقسمو كل المكونات للنصف. و تقدرو تتصرفو في المكونات حسب الموجود عندكم. و اللي عندو لحم علوش و كبدة يكون أفضل من الدجاج.



المكونات : ربطة سلق, ربطة معدنوس, ربطة شبت, ربطة بصل أخضر, خضار : بطاطا, لفت, جزر, حمص منقوع, لفت. (ورقتين رند للمرحلة الأخيرة)




أغسليهم و قطعي الخضار مكعبات, و الأوراق قصيهم رقاق و حطيهم في قصعة كبيرة





بقية المكونات : من 500 ل 600 غ روز شايح موش مغسول. 3 صدور دجاج مقطعين, من 2 إلى 3 م ك طماطم معجونة, 2 م ص فلفل أحمر, 1 م ص فلفل أسود, 2 م ص قرفة مرحية, 1 م ص كزبر و كروية مرحين, 1 م ص كركم, نصف كاس نعناع شايح, 2 فناجن زيت زيتونة, 2 م ص ملح أو حسب الذوق.






قبل ما تزيدي ورقتين الرند, أعجني كل المكونات بيدك مدة 5 دق حتى يتجانس الخليط (أعجني بكل قوة ما ترحميش ههههه)

و بعد حطي ورقتين الرند




حطي الخليط في الكسكاس و عبي المقفول من تحت بالماء مع 2 اعواد قرفة, حطيه على النار يفور مدة نصف ساعة و هبطيه في القصعة حركيه شوية و بعد رجعيه يفور مرة أخرى.





لما يطيب الرز تكون هذه النتيجة





و صحة و بالشفاء , نتمنى تجربوه .


ملاحظات أخرى : بالنسبة للي تجربو و تلقاه خذا وقت طويل في الطياب , في مرة أخرى تزيد من كمية السلق (لأنه أنواع الروز تفرق, يمكن النوع اللي عندها يشرب أكثر)

بالنسبة للي ما عندهاش نعناع شايح تقدر تعوضو بأوراق النعناع الاخضر و تقطعو مع الخضر الاخرين

اللي ما تحبش القرفة تقدر تستغنى عليها.

اللي نجحت فيه 100% نتمنى انها تجربوالمرة الجاية بلحم العلوش و الكبدة