كفتة بالخضروات

السلام عليكم
صينية الكفتة بالخضروات
هده الوجبة تكفي ل 6 اشخاص
المقادير
3 حبات بطاطا
3 حبات جريوات
لحم مرحي حوالي 300 غرام ولا 400 غرام
معدنوس
بصل مفروم
شوية خبز مرحي
فلفل اسود ملح كمون قرفة كزبرة
شوية فرينة
بالنسبة للمرق المقادير
شوية زيت
2 فص ثوم مهروس
حبة بصلة مفرومة
4 حبات طماطم مفرومين
مغرف طماطم مصبرة
ملح فلفل اسود ماء
التحضير
نقشر البطاطا الى اصابع شوية تكون عريضة حوالي 2 سم
والجريوات تاني نديرها بنفس الطريقة ونقليهم ونضعهم في طبق الفرن
من بعد نحط اللحم المرحي والمعدنوس والبصل والخبز المرحي والفلفل الاسود والملح والقرفة والكمون والكزبرة ونخلطهم مليح مليح ونشكل اصابع الكفتة بنفس طريقة البطاطا والجريوات حوالي العرض 2 سم والطول 8 سم (كل متكون الكفتة عريضة تجي بنينة )
ومن بعد نمرغهم في شوية فرينة ويتغطاو بطبقة خفيفة برك
نسخن الزيت ونقليهم حتى يتحمرو شوية ونحطهم في طبق الفرن مع البطاطا والجريوات
في نفس المقلاة نحط الثوم والبصل ونقلي حتى يدبلو ونضيف الطماطم والمصبرة (مغرف)والملح والفلفل الاسود والماء حتى يتغلاو
من بعد نحط الصلصة فوق الكفتة والبطاطا والجريوات ونغلفهم بورق الالمنيوم والى الفرن حوالي 20د او 25د
وصدقوني الطبق هدا بنين بزاف وان شاء الله تجربوه ويعجبكم وتقدرو تقدموه طبق لضياف خاصة في رمضان ليراه على الابواب