ستاك بالجلبان والبطاطا sautée من مطبخي

السلام عليكم ورحمة الله تعالى وبركاته

اليوم جبتلكم وصفة بنينة وخفيفة على المعدة

ستاك بالجلبان والبطاطا sautée

المقادير

لحم هبرة ، جلبانة ، بطاطا ، سمن ، قطعة زبدة ، زيت للقلي

ثوم، فلفل اكحل، ملح ، معدنوس، ملعقة كبيرة خل

اول حاجة نبدو بيها هي اللحم نحلوه كيما في الصورة (ماعرفتش المصطلح كيفاش)

وناخذو بالقطعة وندقوها مليح حتى تولي رقيقة

ونتبلوه بمغرف صغيرة ثوم ، ملح ، فلفل اكحل ، مغرف كبيرة ونص سمن ( ممكن اكثر حسب كمية اللحم)

ومغرف كبيرة خل احمر


ونغمسو كل القطع في التتبيلة ، نغطوهم ونحطوهم في الثلاجة ساعتين على الاقل




نوجدو صوص للبطاطا

نحطوقطعة او زوج من اللحم صغار ومن الافضل فيه الشحمة ( وشوي لحم مفرم ماشي لازم)

مغرف كبيرة سمن ،غير شوي ملح ( بطاطا تكون مالحة ) وفلفل اكحل


ونخلوهم على النار حتى يتقلو ويطلقو الزيت



نمرقوهم بشوي ماء ونخلوهم على نار هادية حتى يتشربو


وفي هذا الوقت نقشرو البطاطا نقطعوها دوائر ونقلوها في الزيت

والصوص تكون خاثرة ومتشربة

نحطو فيها البطاطا وشوي معدنوس ونخلطوها في لاصوص


ومن بعد نحطوها في مول تاع كوشا وندخلوها 10 دقائق فقط غير باش تتقرمش وتروح منها طراوة لاصوص

الجلبانة نكونو غاليناها في الماء وكي تطيب نقطروها في كسكاس

نحطوها في اناء ونزيدولها قطعة زبدة فلفل اكحل ثوم ملح ومعدنوس

وغير تتقلى شوي 5 دقائق فقط ( باش ماتذوبش ) نطفو عليها النار وتكون واجدة

اللحم اخر حاجة نعملوها

نقلوه في مقلة شايحة مانحطو فيها زبدة ولا زيت خاطر يطلق التتبيلة والماء تاعو وهم كافيين باش يتقلى مليح

لي ستاك متبلين واجدين وبنان اممممممم


البطاطا بعد ماخرجناها من الكوشة

والجلبانة

بالصحة والعافية عليكم

لا تنسوني من دعوة خير