الملوخية التونسية على أصولها ..... لعيون أختي لبنى

السلام عليكم و رحمة الله و بركاته

بسم الله

هذه الوصفة هي هديتي للأخت لبنى2 اللي طلبتها, و كذلك للأخت بنت الجزائر و بالطبع لكل عضوات منتدى الجلفة.

اليوم جبتلكم طريقة طبخ الملوخية التونسية اللي تكون مجففة و مرحية موش طازجة و خضراء, راهي ساهلة و بنينة برشة :

المقادير : لحم بقري من الاحسن يكون فيه عظام, كاس كبير ملوخية, 3 ل ماء, قرابة 300 مل زيت نباتي, قرابة 2 م ك كزبرة و كروية ناشفين و مهرسين في وقتها, راس كبير ثوم مهرس, رند, نصف م ص فلفل أحمر(اختياري), نصف م ص فلفل اسود, بصلة صغيرة مقطعة جويدة.نصف م ص ملح.

الطريقة : فوحي اللحم ب( 1 م ك كزبرة و كروية مهرسين و بصلة صغيرة مقطعة و الفلفل الاسود و الفلفل الاحمر و 1 م ك زيت) و خليه يرتاح :

في هذا الوقت حطي الملوخية في صحفة صغيرة : 8 م ك معمرين مليح , شوفو في الصورة كمية كل ملعقة :

و صبي الزيت و حركي حتى تتحصلي على مزيج سائل و متجانس , شوفو هنا :

فوق النار حطي 3 ل ماء في كسرونة كبيرة أو في المقفول , اول ما يغلي صبي مزيج الملوخية و حركي حتى تتحل الملوخية في الماء , اول ما تصبيها تحسيها لزجة شوفو الصورة :

بعد ما تحركيها تحسيها ما عادش لزجة و صارت متجانسة مع الماء, نقصي في النار خليها ما بين النار المتوسطة و الخفيفة على اصغر كانون في الغاز متاعك, خليها تغلي مدة نصف ساعة او ساعة و حطي اللحم اللي فوحتيه في الاول

بعد ساعة اخرى أو أقل حطي بقية المكونات (الرند و معاه الاعواد متاعه يعطيك طعم بنين, الملح و بقية الكزبرة و الكروية المهرسين و الثوم المهرس) :

بعد 3 ساعات بالضبط من أول ما حطيتي الملوخية تلقيها جاهزة : قرت زيتها من فوق , و لونها صار أغمق و صارت أكثف من الاول و ما ننساش الريحة البنينة اللي وصلت اخر المدينة اللي تسكني فيها . (موش لاخر الشارع كيما قلتلكم في المقرونة بالصالصة)

ملاحظة : تقدري تحطي المقادير الكل مع بعضهم من الاول , بالضبط بعد ما تحركي الملوخية اول ما تصبيها.

طفي النار و خليها تبرد, قدميها دافئة :

هذة الأكلة كل ما تخليها في الثلاجة تلاقيها صارت بنينة اكثر من قبل!!! يعني اليوم الثاني تكون ألذ من اليوم اللي طبختيها فيه.

إن شاء الله تعجبكم, و دعواتكم لأمي و أختي اللي علموني هذه الوصفة.

» سلطات للاخت لبنى
» الملوخية
» وينكم يا نسا الشرق على الملوخية
» الملوخية" البامية" من مطبخي
» حجاباتي لعيون حبيباتي