**مقروط الشرق بالسكر الرطب...حصريا من مطبخي**

بسم الله الرحمن الرحيم

اليوم جبتلكم وصفة مقروط الشرق بالسكر قلاصي من مطبخي أو بالأحرى من مطبخ أمي لأنها هي علمتهولي
ربي يخليها ويخلي جميع امهات المسلمين...........المهم قبل سنة 2000 كانت تتفرج حصة للسيدة بوحامد ودارت
المقروط هذا وكتباتو............وكل من ذاقو طلب منها الوصفة
يجي هاااااااايل ويذوب ف الفم
والمرة هذي انا درتو وحدي للعيد وصورتلكم الخطوات

أولا ديري 2 ملاعق صغيرة خميرة الخبز في ماء سخون حوالي 5 دقايق
أنا درتها في باطة مرغرين وقفلت عليها


3كيلات سميد دقيق وليس خشن + كيلة فرينة واذا حبيتي ديري زوج ب زوج
2 ملاعق كبيرة سكر + ملح


كيلة مرغرين ذائبة


نخلطو خليط السميد والفرينة مع المرغرين ونخليوه يرتاح شوي


ونكملو نلموهم وليس نعجنوهم بماء + ماء زهر بعد اضافة الخميرة اللي ذوبتيها من قبل
أمي كي كتبت الوصفة على اساس تضيفي غير ماء الزهر
مي هي تخلطو مع الماء وانت لك الاختيار
نلموهم حتى تصبح عجينة متماسكة وطرية


نتركها جانبا ترتاح لساعة او نصف ساعة


ومن جهة أخرى نحضر كيلة غرس مرحي + حوالي ملعقة كبيرة زبدة ذائبة
ونخلطوهم على نار هادئة حتى يرطاب الغرس ونضيفولو شوية قرفة + طيب
و مكسرات أنا درت كاوكاو + جوز


ونشكل مقروطات بأي شكل حبيتيه




ندخلوه للفرن تكوني سخنتيه من قبل ....... في درجة حرارة 160
يطيب من تحت لمدة 15 أو 20 دقيقة
وحمريه من فوق


وبعد اخراجو مباشرة من الفرن مرغيه في السكر الرطب
لأنو اذا برد ميلصقش


وهاو المقروط تاعنا واجد


هاهي الكمية اللي تحصلت عليها من المقادير اللي حطيتها


صح عيدكم حباباتي.........أعاده الله علينا باليمن والبركات
تقبل الله منا ومنكم صالح الاعمال

*****أمانة اللي قرات مواضيعي تدعو لأبي بالشفاء العاجل*****


وصل الله وسلم على سيدنا محمد وعلى آله وصحبه أجمعين