قاطو النشا ساهل و بنين و اقتصادي و انا مجرباتو

السلام عليكم اخواتي
صحبتي عطاتلي وصفة نتاع قاطو و انا درتو و جا هايل
5 بيضات كاملين
1 كاس زيت
1 كاس سكر عادي
فاني
1 خميرة
نشا و قليل من الفرينة
قرصة ملح اكيييد
التزيين : نواد كوكو و مربى المشمش
طريقة تانية للتزيين : نواد كوكو و كاكاو و سكر مرحي و مربى

التحضير : اختي خلطي البيض + الزيت+السكر +فاتي + قرصة ملح
و من بعد النشا ( من الافضل اشري اللي بالميزان باكي تستقاملك ارخص من اللي فالعلب )+ خميرة
و في الاخير شوية فرينة حوالي فنجان .

شكلي كويرات صغيرة و دخليهم للفور 10 دقايق 180 درجة

و كي يطيبو اغطسيهم في المربى و من بعد نواد كوكو .

الطريقة الثانية : اقلي نواد كوكو على نار هادية جدا ثم زيدي كاكاو و سكر قلاسي (نفس الكمية) و طبعا على حساب كمية النواد كوكو رايح يولي لونو بني .
نفس الشي اغطسي حبات القاطو في المربى ثم في النوادكوكو البني .

صدقوني جربوه و ان شاء الله رايح يعجبكم .
ملاحظة : هاد المقدار يديرلك من 70 الى 80 حبة غلى حسب حجم الحبات . افضل لاول تجربة استعمال نصف المقدار .