لي كرهت من المقلي المرقة و العجائن تدخل شكشوكة من مطبخي

بسم الله الرحمن الرحيم


مرات كثيرة نكره من القراتان ، القليان ، المرقة و العاجائن و نحب ندير حاجة خفيفة

و احسن حاجة شوية شكشوخة بالخضار

كل واحد كيفاش يعمل الشكوكة هاذي طريقتنا بالخطوات و الصور

خخخخخخخخخخخخخخخخ و كي العادة بالتفصيييييييييييييييييييييييييييييييييييييييييييي يييييييييييييييييييييييييييل الممل

جماعة لا مليتو قولولي نقص من التصاور في مواضيعي خخخخخخخخخخ


المهم المقادير ساهلة جدا و متوفرة في كل بيت

بصل بطاطا جريوات " قرع اخضر " فلفل اخضر حلو




نغسلوهم مليح و نقشروهم
الجريوات نبرشوها قليلا نحيو القشرة الخضراء اليابسة حتى ما تقعدش قاسية
الفلفل نقسموه على اثنين و نحيو الخيوط البيضاء لي توجد بالداخل



نقطعو البصل شرائح
نقطعو الجريوات و الفلفل قطع صغيرة
لي يحب الباذنجان يقشرو و يضيفو مكعبات انا ماكانش عندي اليوم

لي يحب الحار ممكن يقصو صغير و يضيفو للطبخة




نحطوهم على النار و نحطو عليهم 4 ملاعق كبار زيت شويةملح شوية فلفل اسود و نغلقو

نخليوهم يطيبو على البخار
انا نحط البصل اولا حتى يطلق الماء نتاعو و من فوق الجريوات ثم الفلفل



لما يطيبو نص طياب نضيفو البطاط المقطعة قطع صغيرة جدا و نزيدولها شوية ملح



هنا لما البطاط طابت




نخلطوهم مع بعض و نذوقو الملح لكان ناقص نزيدو




نديرو شوية طماطم مصبرة ملعقة صغيرة لي يفضل الحب يستعمل حبة مرابية و نقص الثوم لي يحبو مبروش يبرشو انا عن نفسي فالشكشوكة نحبو مقطع صغير و نخلط الكل




نخلطو زوج بيضات مع رشة ملح



بالملعقة نحاولو نبسطو السطح و نسكبو البيض حتى يتوزع بالتساوي و نغلق



هنا لما البيض خلاص طاب نطفي النار



هادي سلطة جزر و خيار







هاذا شكل الشكشوكة قطع قطعة صغيرة حتى تبان مليح
لي يحب يوضع فرماج لما يطفي و يخليه يذوب بفعل الحرارة يحط

انا زينتها بشوية مايونيز فقط




و هادي بيتزا في بلاصة الخبز





و هادا عشانا اليوم