كباب من مطبخي وبطريقتي الخاصة

السلام عليكم نقدملكم طريقتي الخاصة في عمل الكباب وهو طبق تقليدي معروف عندنا خاصة للمبتدئات لانو ساهل وبنين
المكونات
لحم هبرة مقطع مربعات
جزر مقطع
2حبات بصل كبيرة مرحية مليح مع 4 سنات ثوم الكمية شوية كبيرة لانها هي اللي تثقل الصلصة كاين اللي يزيد في الاخير ملعقة فرينة لكن انا نفضل البصل
ملح وفلفل اسود وكسبر مرحي وكروية
ورقة رند اختيارية لانو كاين اللي مايحبش مداقها
2 ملاعق طماطم مصبرة وممكن اقل حسب نوعية الطماطم
علبة من الفطر




للتزيين
بصل مقطع ودبشة مقطعة







التحضير
تحطي قطع اللحم في 4 ملاعق كبار زيت لان اللحم مافيهش الشحم اما ادا كان اللحم فيه الدهون نقصي كمية الزيت حطي الكل على نار قوية حتى يتقلي اللحم وياخد اللون البني الفاتح







زيدي فوقو البصلة والتوابل والطماطم وخلي الكل يتقلى 10 د زيدي الجزر ومرقي بالماء حتى يتغطى الكل واغلقي الكوكوط وكي يغلي نقصي النار وخليه من ساعة ونصف لساعتين
في هدا الوقت تكوني شوحتي الفطر في ملعقة زبدة 5 د وتضيفيه وتخليه ربع ساعة






وفي الاخير ارمي قرن فلفل حار حتى ياخد الغلوة وطفي لازم تكون الصلصة خاثرة وثقيلة
عند التقديم زينيه بالبصل والدبشه او الحشيش المقطع










قدميه مع الخبز ولا الارز حسب الرغبة انا شخصيا نقدمو مع الخبز

ها قولولي واش رايكم