بسبوسة بالفرينة

البارح رحت نصنع بسبوسة صبت التشيشة متكفيش فتشت فلاجوندا تاعي صبت هذي البسبوسة لاروسات من عند ختي ميمي و هذيك الكمية تاع التشيشة درتلي بسبوسة هايلة إليكم المقادير :
كأس زيت + كأس سكر + نصف كأس تشيشة + كأس فرينة + 4 حبات بيض + باكي خمارة الحلوى + فانيلا + عسل



ضربي البيض و السكر مليح ثم الزيت و زيدي ضربي



بعدها بيدك كبي التشيشة و خلطي



ثم الفرينة و الخمارة و الفانيلا



إدهني المول تاعك و فرغي الخليط و ديريه إطيب بعد ما كنت سخنتي الكوشة مليح





غير تخرجيها عسليها بعسل بارد (عسل أم قادة جزاها الله كل خير)



أيا مدو يديكم و بصحتكم هههه نشالله تعجبكم و متنساوش ختكم بدعوة لوجه الله

(هذي راني زدتها ضوكا عيطت لأختي و قلتلها قاع عجبتهم بسبوستك قاتلي قوليلهم يقدرو إزيدو 2 ملاعق مايزينة تجي خفيفة و تذوب فالفم)