سلام الله على الجميع
هاذي هي الوصفة نتاع القاطو اللي طلبتها مني بعض اخواتي بالمنتدى إن شاء الله تجربوها و تعجبكم
العجينة :
3 كيلات فرينة ( 300 غ)
1 كيلة إلا ربع غير مملوءة مارغرين ذائبة و باردة (80 غ) (المارغرين اللازم استعمالها هي مارغرين التوريق اللي خدمنا بيها هي مارغرين التوريق صالحة)
1 ملعقة صغيرة فانيليا
كأس( نصف ماء زهر و نصف ماء)
ملون غذائي حسب الرغبة
التحضير:
في وعاء غربلي الفرينة و ديري حفرة في الوسط أسكبي فيها الزبدة اللي تكوني ذوبتيها و خليتيها تبرد نضيفو الفانيليا و نخلطو بالأصابع نذوبو الملون الغذائي في ماء زهر و نضيفوه للخليط حتى تتحصلي على اللون اللي حاباتو نزيدو الماء و ماء الزهر بالعقل حتى تتشكل عندك عجينة طرية و متماسكة . غلفي العجينة بغلاف بلاستيكي و خليها تريح ثلاث ساعات قبل الإستعمال.
الحشو :
3 كيلات (500غ) لوز مرحي ( أنا استعملت كوكاو مرحي أرطب باه يعطيك منبعد للحلان)
1 كيلة غير مملوءة (300 غ) سكر أرطب
1 ملعقة كبيرة قشور ليمون
نصف ملعقة كبيرة فانيليا
3-4 بيضات على حسب الحجم
التحضير :
حطي اللوز المرحي ( أو كوكاو) و أضيفي السكر الأرطب و الفانيليا و قشور الليمون خلطي الكل مليح نزيدو البيض اللي نخفقوه بالشوي و نخلط الكل باليد حتان تتشكل عندنا عجينة ملساء ما تلصقش في اليدين.
الطريقة
حلي العجينة اللي تكون ريحت مدة 3 ساعات على طاولة مرشوشة بالفرينة ( اللي عندها آلة العجن تحل بيها و اللي ماعندهاش الحلال يكفي ) نحط هاذي العجينة بجنب و نحل عجينة اللوز بسمك 5 ملم .
نحط عجينة اللوز اللي حليتها ( من الأفضل تحليها على غطاء بلاستيكي باه تعطيك للهزان منبعد ) فوق العجينة الأولى و نزيد فوق عجينة اللوز طبقة أخرى من العجينة الملونة اللي عندي . ثم نحل بالحلال الطبقات الثلاثة اللي تشكلت عندي بسمك 2 ملم تقريبا .
قطعي معينات بالمول نتاع العين ( أو المول البيضوي يباع بالمحلات )
هاذا هو المول
( باه تخدمي حبة تحتاجي أربع معينات زوج من الفوق يكونوا مخدومين بالنقاش و زوج من التحت )أطوي المعين على النصف و لصقي كل زوج ببياض البيض و اعملي خطوط بالنقاش على الزوج معينات الأخرى و بنفس الطريقة تطوى على زوج و تلصق ببياض البيض و تلصق مع الزوج الأوخرين اللي منقشناهمش و يلصقو ببياض البيض أيضابعد الطهي تعسل حبات القاطو ( التعسيلة كيلة شاربات بكيلة عسل نتاع السوق ) ( ملاحظة كي تخرج حبات القاطو من الفرن و باه يخرجلك شكل البابيون مليح اضغطي بصبعك عليها من الوسط )
بالنسبة للتزيين
اللي عندها المول نتاع السيليكون تخدم بيه السلسلة و ذلك بإستخدام عجينة اللوز أو عجينة التزيين اللي تباع في المحلات
و اللي ما عندهاش المول نتاع السيليكون دير كرات بعجينة اللوز أو عجينة التزيين و منبعد تحط الكرات الوحدة بجنب الاخرى و تضغط من الجناب بالشوي و تحطهم فوق الحبة نتاع القاطو راح تحتاج تقريبا من 6 إلى 7 كرات بعد ما تخدمي السلسلة لحبة القاطو مرري عليها بالملع الرقيق .اللي عندها سؤال راني هنا 
السبت مارس 19, 2016 12:54 pm من طرف هاله زادة
اليومية
