***المقروط بالتفصيل للمبتدئات***

السلام عليكم ورحمة الله وبركاته
بسم الله الرحمان الرحيم
صباحكم فل اخواتي العزيزات
اليوم نقدم لكم المقروط بجميع مراحله وتفاصيله واسراره وكل وحدة تلاقي فيه صعوبة او اول مرة تجربه تنجح فيه باذن الله وتتحصل على نتيجة جد مرضية اذا اتبعت جميع المراحل دون اهمال مرحلة
نبدا على بركة الله

نبدا اولا بالغرس
نشتري نتاع الكيلو غير المنقى ننزع منه العظام وننقيه جيدا نحطه يفور في كسكاس بمجرد ما يطلع البخار خلاص نخليه يبرد شوية ونعبزه بالشوكة ونزيد نقيه مليح ونعجنه بشوية زيت
انا هنا قسمت الكيلو على اثنين جزء للمقروط والجزء الاخر للرفيس
غرس المقروط يعطر بالقرفة والقرنفل مرحيين ناعم ونضيف له خميرة كيميائية + شوية جلجلان


العجين
باه يجيك هشوش وطري عنده سرين
السر الاول نستعمل مرغرين لابال طرية وليست ذائبة وكانك رايحة تخدمي قاطو والنتيجة في الهشاشة ما تتصوروهاش
والسر الثاني يعجن بالماء البارد باه العجين يتلم مليح بصح ما يتعجنش اخدمي على راحتك

المقادير
علبة مرغرين لابال 250غ ننزع نصفها ونملا الفراغ بالزيت نتحصل على كيلة مرغرين + نص كيلة زيت اخدميهم مليح بيدك حتى يتجانس الخليط



اضيفي صفار بيضة وكملي خلطي بيدك مليح



اضيفي 3 كيلات دشيشة يعني سميد منزوع منه الرطب وحكي جيدا بالايدي + شوية ملح



اضيفي 2 كيلة فرينة ونص خميرة كيميائية حكي مليح بالايدي





الان اعجني باصابعك بحوالي نص كيلة ماء بارد او اكثر بقليل


غطيها بكيس نايلون وخليها ترتاح ربع ساعة

حضري لوازم العمل فرينة وسكين نقاش والغرس والطابع



اقسمي العجين على اربعة والغرس على اربعة



سطحي العجين حرابيش بطول 50سم وعرض 7 سم خلي الفراغ بيناتهم



ضعي وسطهم الغرس



لميهم مليح واضغطي جيدا ما تخليهمش مفتوحين



نمرر السكين تحت الحرابيش اتسهيل عملية قلبهم



نقلب جميع الحرابيش لان الجزء السفلي انعم من العلوي لتفادي كثرة التشققات الناتج عن عدم جمع العجينة جيدا



ننثر فوقها الفرينة لتنعيم اكثر ولملا الفراغات او التشققات ولتفادي لصق العجينة في الطابع ونمسحها باليد





نستخدم كيس بلاستيكي لتنعيم وضبط شكل الحرابيش نضع الكيس فوق الحربوش ونملس الجوانب والسطح



شوفوا كيف اصبحت متساوية وناعمة للحصول على نقش جميل



نبدا عملية الطبع والتقطيع انا غيرت ودرت شكل المعين حسب الطريقة الموضحة بالصور





نكمل عملية التعيين في جميع الحرابيش



ثم نقص بسكين حاااد



ننقش ...انا لا اجيد النقش نحب مقروط الطابع اسهل واريح ...



نستفوا الحبات في صينية



ملاحظة
الحبات الموجودة في نهاية الصف واللي الغرس ظاهر على برة نغطيه بشوية عجين باه ما يتحرقش وييبس وكي يطب ننزع العجين بالسكين

ندخل الصينية للفرن المسخن مسبقا كي يطيب من اسفل نحمروه من فوق
نخرجه ونسقيه بالعسل وهوساخن والعسل بارد باستعمال ملعقة ونسكب على جميع الحبات



خليه يبرد تماما والشقوق تتلم وحدها ثم انزعي الحبات برفق وبواسطة سكين





والجزء الثاني من الغرس درت بيه رفيس

رطل غرس منقي مفور معجون بشوية زيت +نص علبة زبدة ستار +كمشة كوكاو رقيق مش ناعم
نحمص التشيشة وذرة ملح في مقلاة ونضعها فوق المقادير السابقة ونزيد نص فنجان حليب وهواللي يعطيها الطراوة نعجن مليح ونشكله باي قالب
التشيشة عينك ميزانك ماهي كثيرة ماهي قليلة




سلامي الحار لكم ولا تنسوني من صالح دعواتكم