طريقة صنع العسل مجربة

السلام عليكم
دخلت وقريت طريقة صنع العسل من في الكوكوت مينوت مادخلتليش لراسي ماشي نهدر في اللي كتبتها بالاك هي لقاتها ونقلتها يعني مش مجربة. لانو العسل باش يولي عندو لون عسلي شباب لازم يذوب وحدو قبل مايتخلط بالما ولا يولي عسل ابيض
المهم طريقتي دايما نديرها ومجربتها
تجيبي سكر قيس 2 كيسان وكاس ماء وشوية قارص ولا الشب
تحطي السكر وحدو في الكسرونة وتشعلي النار عليه وخليه يذوب وحدو وانت اقعدي حركيه حتان تبداي تشوفي اللون نتاعو ولا عسلي لازم النار تكون ناقصة باش مايتحرقش
امباعد كي تشوفيه بدا يولي عسلي في اللون (ماشي لازم يذوب قع السكر المهم يمد اللون اللي راكي حاباته)فرغي الماء فوقو ونقصي للنار وخليه راح تشوفي بللي المغرف اللي كنت تحركي بيها لصقت ماعليش ماتخافيش خليها من بعد يذوب السكر نحيها وثاني الماء يبدا يطير ويتطرطق ثاني ماتخافيش
نقصي للنار مليح وخليه حتان يبدا يغلي
وكيفاش تعرفي بللي طاب العسل انتاعك تشوفي بللي تشكل فوقو فقاعات صغار وبزاف فوق الوجه نتاعو لا شدي مغرفة دخليها فيالعسل وخرجيها وخليها تبرد من بعد مسي ها بصبعك اذا بدا يتلاصق معناها خلاص طاب واذا شفتيها كي الما زيديلها شوية
ماتنخدعيش العسل كي يطيب وهو سخون مايكونش ثقيل ولا جامد يكون سائل يعني لازم تجربي بالمغرف كيما قتلك
وكي يطيب في الخر اعصريلو شوية قارص واذ اعندك الشب ديريه مع الماء يعني من الاول
انشاء الله نكون فدتكم
المهم انكم كل ما تديرو السكرالماء يكون نصف كمية السكر