لكل من تريد تعلم القلب اللوز.....حصري مع لؤلؤة الفردوس

بسم الله

راني حطيتلكم المقادير مالا دركا نكتبلكم قبالا الطريقة تبعو معايا مليح

طريقة تحضير عجينة القلب اللوز

ضعي الدقيق في طنجرة + السكر و خلطيهم مع بعض مليح مليح + كأس لاتاي سمن ذائب ماشي سخون و من الأحسن يكون بااارد و نخلط مليح باليد يعني تحكيه بيدك و خليه يدخل مليح مليح في السميد حكي حتى تشوفي بلي خلاص دخل فيه كامل + كأس واحد لاتاي ماء الزهر ماتفرغيهش مباشرة رشي و خلطي كيما كي تفتلي الطعام حركي بحركة دائرية ماتعجنيش + كأس و نص تاع الماء و أخدميه مليح مليح بيدك حتى يتخلط كامل العجين خلطي و حكي بزوج يديك

هذا مكان غطيه بنيلون مليح و خليه يبات هاكدا / وجديها في الليل / و خليه يبات ولا تحبي تديريها مع الصباح باكر في الليل أخدميه كيما تحبي

الآن راهو بات ..........زعما هههه ....نفتحو النيلون و نكملو عليه باقي المقادير نفتحو النيلون و نعاود نخلط الخلطة من جديد خلطي بحركات دائرية و نزيدلها كأس ماء الزهر لي بقا و نخلط مليح هنا دخلي بين يديك كشغلت تعصري اعصري و خلطي + كأس ماء و نصف لي بقات ثاني و نخلط مليح باليد نعجنوه بأصابع اليد و اعصري و خلطي تلاحظي الخلطة ولات جارية و السكر ذاب فيها مليح ///خلاص دركا العجينة راهي واجدة///

ملاحظة كي توجدي العجينة كامل ماتخليهاش تقعد خارج الهواء أكثر من ساعة

دركا نروحو للحشوة لي اتديرش اللوز تبدلها بالكاوكاو
اللوز + السكر نرشوه بالماء الزهر خليه ناشف شوية

نحكم مول او سنيوة مدهونة بالزيت //نقسم العجينة على زوج // لي يدير الحشوة يقسم العجينة على زوج و لي مايديرهاش يفرغ مستوى العجينة مباشرة في المول

نضع النصف الاول في طبقة السنيوة مشيها مليح خاطرش تلاحظي بلي ماتكفيكش هي تجي طبقة رقييييقة ماشي خشينة مشيها مليح في المول ثم انثري الحشوة في الوسط و زيدي القسم الاخر تاع العجينة من الفوق //شمخي يدك و ضعي العجينة بالعقل باش ماتلصقش في يديك //....و دخليها للفرن مباشرة ماتقطعيهاش على درجة حرارة 190 او 210 على حسب نوع درجة الحرارة تاع الفرن ديالك لمدة حوالي ساعة واحدة 1سا كي تلاحظي بلي طابت من التحت خليها تحمار مليييح و تشوفيها حمارت شوية من الفوق بلا ماتشعلي من الفوق خرجيها من الفرن و قطعيها كيما تحبي و ديري حبة لوز في وسط الحبة رجعيها للفرن اشعلي عليها من الفوق و خليها تحمار مليح مليح تقريبا قريب تتنحرق .....خلاص راهي طابت غير تخرجيها فرغي عليها كامل السيرو لي خدمتيه و طفي الفرن و رجعي السنيوة تشرب شوية في الحرارة لي بقات كي تشوفيها شربت شوية عاودي خرجيعا و خليها تشرب خارج الفرن

بالنسبة للسيرو
: نضع السكر + الماء + برج قارص نحطهم على النار غير تغلي خليها مدة 10 دقائق غليان و طفي

بالصحة و الهناء

أي استفسار أنا في الخدمة

لي طلبت صورة المول باذن الله نحط صورتو غدا

أنتظر تطبيقاتكم

بالنسبة لي طلبو حجم الكاس