حلويات للعيد

حلوة الجلجلانية
كاس زبدة دايبة
كاس زيت
كاس مزهر
كاس جلجلان محمص حب
4 م غ سكر عادى
1خمارة
فرينة
للتزيين
عسل
جوز الهند
الطريقة
خلطى السوائل مع بعض مليح ثم ضيفى السكر +الفانى+الجلجلان وثم الفرينة +الخمارة = عجينة طرية ....ترتاح 15د اعمليها حربوش وقطعيها مقروطات طيبيها طياب خفيف حوالى 15د غطسيها فى العسل وغبريها فى النواة كوكو او الكاوكاو
انا شخصيا نحبها بنواة كوكو لديدة وهشة وطعمها رائع جربوها وماشى رايحين تندموا



نبداو على بركة الله فى الحلوة الثانية وهى حلوة العرايش رايحين تتسالوا وتقولوا شكون الى ميعرفش العرايش هى صح عندكم الحق لكن هى فيها اضافات رايحة تخلي عندها بنة خاصة
اولا المعروف فى العرايش 3 كيلات فرينة تقابلها 1لدام الاضافة هنا اختى (قبل ماتوضعى للفرينة السمن حكيها ب150غ مرغرين توريق مليح ثم كملى بالسمن

ثانيا لما تكملى العجين ويرتاح خليه يرتاح ليلة كاملة من الاحسن وليس بضرورة
ثالثا عمرك ماتحلى العجين لانك لما تقطعى دوائر العجين المتبقى راح يفقد الطراوة نتاعوا ادن بدل ماتحليها شكليها كويرات حسب حجم الحبة ولما تحليها على طريقة عجينة التوريق اى .خدى الكويرة حليها شريط وطبقيها على ثنين ثم عاودى طبقيها ثم حليها على شكل دائرة وكملى الباقى .....
رابعا لما تشكلها من الاحسن انك تخليها تبات باش طيبيها
انا ملى جربتها وخرجت هايلة نعتمد دايما على هده الطريقة المهم جامى تحلوا العجينة مرة وحدة عرايش.....تشارك...الخ دائما شكلوا كويرات قد الحبة المطلوبة

ناتى للطلية جربت بزاف انواع لكن هده الطلية والله غير ناجحة 100/100



1/2 لتر ماء +150غ سكر طيبيهم =شربات لاثقيلة ولا خفيفة =15د طياب
لما تبرد خدى كاس وضيفيلوا 1 بياض+2م غ عصير قارص +2 م غ مزهر وخلطى بليد مع اضافة السكر القلاصى حوالى علبة ثم ضفى الملون مداب فى شوية مزهر ادارغبتى فى تلوينها راهى تنشف فى دقيقتها مطولش انشالله نكون افدتكم


المهم انا الوصفات الى نكتبهم غير الى نشوفهم ناجحين وملاح

قبل ماننسى المرغرين التوريق لازم تكون قطع ماهيش دايبة الى دكرتها فى العرايش نسيت مكتبتهاش




حلوة بنواة كوكو

250غ مرغرين طرية

250غ جوز الهند

3صفار بيض

5م غ سكر عادى

1 فانى

1خمارة

فرينة

عسل

التحضير ادلكى المرغرين والسكر+الفانى مليح =كريمة ضيفى لها جوز الهند ثم الصفار ثم الفرينة +الخمارة = عجينة طرية = ترتاح 10د =كويرات صغار

طيبيهم قليلا ثم عسليهم و غبريهم فى الجوز الهند وضعيهم فى ليكسات


هدا الحلوى جربتها عدة مرات هايلة نتمنى تعجبكم

نصيحة ادا حبيتوا تتحصلوا على حلويات هشة جربوا هده الطريقة

الرغرين تاع 250غ نقصى منها 100غ وعوضيها ب 100غ زبدة ستار +2 م غ زيت خديها كقاعدة اساسية فى كل الحلويات رايحة تتحصلى على نتيجة مليحة


حلوة الهرم



250غ مرغرين طرية

كاس ناقص سكر قلاصى


2 م غ لحضة

3 كيسان كاوكاو محمص مرحى بالقشور البنة نتاعوا فى قشروا


كاس نشا


قرصة خمارة


حبة بيض


فرينة


المرغرين +السكر =مرهم +البيض ثم الكاوكاو + النشا ثم الخمارة +الفرينة = عجينة طرية


حليها سمك خشين شكليها مثلثات اعملى لهم ثقبة فى الوسط باصبعك ثم غمسيهم فى البيض ورمديهم فى الكاوكاو مرحى خشين بقشوره


طيبيهم ثم عسليهم وعمرى الثقب بالمعجون او حليب نسلى معقم

عندها بنة هايلة




نصيحة للمبتدئين

ياختى صنع الحلوة فى الشتاء وفى الصيف تختلف

فى تحافض على طراوتها بسبب عامل الرطوبة هذا فى فصل الشتا ء اما فى الصيف تشيح بسرعة وهذا طبعا لعامل الحرارة كاين هناك نصيحة باه نتجنبوا

هذا المشكل وتبقى الحلوة طرية اكثر وقت ممكن فى الصيف طبعا وخاصة حلويات تاع لعراس نخدهم قبل الوقت


متلا العرايش القاعدة نتاعها هى 3كيلات فرينة لما نحضروها فى الصيف كيفاش تعملى


ديرى 2كيلات فرينة + 1 كيلة نشا


وحاولى دائما تضفى النشا للحلويات النشا يلعب دور كبير انوا يحافض على طراوة الحلوة فى الصيف